L-GĦANJA TAL-POPLU36 Edizzjoni

 

 

Regolamenti

(Niżżel kopja tar-Regolamenti u Applikazzjoni format pdf )

Il-festival

1.   Il-festival L-Għanja tal-Poplu 2011 se jkun festa ta’ kanzunetti oriġinali bil-Malti.

2.   Il-kanzunetti se jkunu interpretati u akkumpanjati live.

3.   Għall-iskop ta’ dawn ir-regolamenti, il-kelma ‘parteċipant’ tfisser ‘kompożitur, awtur, grupp jew kantawtur li ħolqu l-kanzunetta’. Il-kantant/a/i flimkien mal-mużiċist/i jinterpretaw il-kanzunetti tal-parteċipanti. Huwa mħeġġeġ, għalkemm mhux bilfors, li min joħloq il-kanzunetta jkollu sehem attiv fl-esekuzzjoni tagħha.

4.   Kull parteċipant, kantant jew mużiċist li jieħu sehem fis-serata finali tal-festival għandu jkollu ’l fuq minn sittax-il sena fil-21 t’April 2012.

 Il-kanzunetti

5.   Il-kanzunetti jridu jkunu bil-Malti u l-vuċi trid tkun tinftiehem.

6.   Il-kanzunetti jridu jkunu oriġinali u li qatt ma ġew ippubblikati .

7.   Is-suġġett tal-kanzunetti jista’ jkun dak kollu li jridu l-parteċipanti.

8.   Kanzunetti b’suġġett vulgari jew ta’ propaganda partiġġjana ma jiġux aċċettati.

9.   Il-kanzunetti ma jridux ikunu itwal minn tliet minuti u nofs.

L-ewwel selezzjoni                                                                                                        

10.     Il-kumitat organizzattiv se jaħtar persuni indipendenti minnu li jkunu inkarigati jorganizzaw il-ġuriji.

11.     Il-parteċipanti huma mistiedna jissottomettu sa tliet (3) kanzunetti differenti għall-ewwel fażi tas-selezzjoni.

12.      F’din l-ewwel selezzjoni, il-ġurija se tagħżel il-kanzunetti skont il-kliem u l-melodija. Għaldaqstant f’dan l-istadju, ir-rekording demo m’hemmx għalfejn ikun ta’ kwalità professjonali. B’hekk, parteċipant jista’ jevita spejjeż żejda.

13.     Ir-rekording tal-kanzunetta jrid jagħti idea tal-mod kif il-kanzunetta se tinstema’ waqt il-festival.

14.     Il-kanzunetti jridu jkunu rrekordjati fuq CD.

15.     Kull CD titqiegħed f’envelopp ta’ qies A4 flimkien ma’ erba’ kopji tal-lirika u l-applikazzjoni mimlija mill-parteċipanti. Ma’ kull CD titħallas kontibuzzjoni ta’ €25 għall-parteċipazzjoni fil-festival. Dawn iridu jaslu l-Y.T.C., 227 Triq il-Merkanti l-Belt, nhar it-Tnejn 13 ta’ Frar 2012 (, data issa estiża għas-27 ta' Frar 2012), jew filgħodu bejn l-10.30 am u l-11.30 am inkella filgħaxija bejn is-7.00pm u d-9.00 pm.

16.      L-awturi u l-kompożituri li jkunu daħħlu kanzunetta għall-festival jingħatawlhom biljett għas-serata finali. Il-kantawturi u l-gruppi jingħatawlhom żewġ biljetti. Dawn iridu jinġabru mill-Y.T.C. fl-ewwel ġimgħa ta’ April.

L-għażla tal-kanzunetti finalisti

17.     Wara li jintlaqgħu l-applikazzjonijiet, jintgħażlu l-kanzunetti finalisti.

18.     Il-ġurija tal-ewwel selezzjoni ma tkunx l-istess ġurija tas-serata finali.

19.     Kanzunetta li tkun intgħażlet bħala finalista ma tistax tiġi rtirata mill-parteċipanti.

 

Preparazzjoni għas-Serata Finali

20.   Wara li jitħabbru l-kanzunetti finalisti jingħata żmien biex il-kanzunetti magħżula għas-serata finali jiġu rrekordjati għall-pubblikazzjoni fuq is-CD uffiċjali tal-Festival.

21.     Il-copyright tal-kanzunetti jibqa’ tal-awturi u l-kompożituri rispettivi.

22.     Il-parteċipanti finalisti tingħatalhom pubbliċità fuq il-mezzi tax-xandir fil-ġimgħat ta’ qabel il-festival. Għalhekk il-parteċipanti għandhom jikkoperaw mal-kumitat organizzattiv biex dan ikun jista’ jsir.

23.     Dawk il-finalisti li jsibuha difficli biex jakkumpanjaw il-kanzunetti tagħhom live, il-kumitat se jgħinhom billi jipprovdilhom is-servizz ta’ pjanist bi ħlas nominali.

Il-provi

24.     Min se jieħu sehem fil-festival irid jkun lest li jattendi f’dawn id-dati:

·         Il-Ħamis 19 t’April filgħaxija, meta ssir l-ewwel prova tal-kanzunetti individwali.

·         Il-Ġimgħa 20 t’April filgħaxija, meta ssir il-prova ġenerali.

·         Is-Sibt 21 t’April mis-7:30p.m., meta tibda s-serata finali sakemm jitħabbar ir-riżultat.

25.     Il-kumitat se jipprovdi: pjanu, drum-kit elettroniku, kif ukoll tliet digital input boxes (għal, pereżempju, żewġ kitarri u strument ieħor), żewġ mikrofoni għall-kantanti u żewg mikrofoni għall-backing vocals. Il-kanzunetta għandha tkun esegwita b’mod sempliċi kemm biex tirrifletti l-karattru tal-festival, kif ukoll biex jitnaqqsu d-diffikultajiet tekniċi. Jekk tipprevedi problemi tekniċi kkuntattjana minn qabel.

26.     L-attenzjoni tal-ġurija u l-udjenza se tkun fuq il-kliem, il-mużika u l-interpretazzjoni tal-kantant. Ftakar li żidiet oħra, bħal żfin u mima,  jistgħu jtellfu l-attenzjoni.

Is-serata finali

27.      Il-kanzunetta li titkanta fil-finali trid tkun l-istess kanzunetta li tkun ippreżentata fl-eliminatorja.

28.     Jiġu ppreżentati trofej lill-parteċipanti tal-aħjar tliet kanzunetti u tingħatalhom l-opportunità li jagħżlu kantant/a biex jieħu/tieħu sehem f’festival barra minn Malta , inklużi s-safra u l-akkomodazzjoni.

29.     L-awtur u l-kompożitur tal-kanzunetta rebbieħa ta’ L-Għanja tal-Poplu 2012 jingħatalhom ukoll it-trofew L-Għanja Tal-Poplu li jinżamm sal-edizzjoni ta’ wara, u żewg safriet f’destinazzjoni fl-Ewropa, skont l-għażla tagħom.

30.     Jingħataw ukoll trofej (a) lill-awtur tal-kanzunetta bl-aħjar tema soċjali, (b) lill-kantant/a jew grupp bl-aħjar interpretazzjoni, u (ċ) lill-kantant tal-kanzunetta rebbieħa. Din is-sena se jingħata wkoll premju għall-aħjar kantawtur/riċi u l-WAFA se tippreżenta premju ieħor għall-aħjar talent żagħżugħ.

31.     L-Għanja tal-Poplu 2012 se jixxandar fuq it-TV u l-internet.

32.     Il-Kumitat se jippubblika CD uffiċjali tal-festival bi ktejjeb bil-lirika tal-kanzunetti.

33.     Id-deċiżjonijiet tal-Kumitat l-Għanja tal-Poplu huma finali.

Is-sehem tiegħek f’dan il-festival għandu jkun esperjenza pożittiva, għalhekk inħeġġuk tipparteċipa. Jekk għandek xi mistoqsija jew diffikultà, nistidnuk tikkuntattjana. Min-naħa tagħna se nżommuk aġġornat/a b’dak li jkun qed jiġri permezz tal-website www.ghanjafest.com. Jekk għandek ħbieb li jista’ jinteressahom li jieħdu sehem fil-festival, ħajjarhom jieħdu sehem.